Pinagdududahan nan g kanyang mga kababayan si Mayor Amy Navarro ng siyudad ng Santiago sa Isabela dahil nananatiling bukas at namamayagpag ang mga bahay-aliwan na matatagpuan malapit sa bahay mismo ng alkalde sa kabila ng mga pag-batikos sa mga ito dahil sa pagkakaroon ng prostitusyon.

Ang mga tinutukoy na bahay-aliwan ay and DA BEAU disco pub na pag-aari ng isang alyas Oca Jr., JAC’s, NEONLIGHTS, ANGELINE at GATEWAY disco pub na pag-aari nina Jess R, Cris M, Allan B at alyas kalbo na nagmamalaking tauhan ni Mayor Navarro.

Ayon sa isang konsehal ng Santiago City, marami na ang nagrereklamo laban sa mga nasabing bahay-aliwan dahil lalo umanong nagiging talamak ang operasyon ng prostitusyon doon ngunit kapansin-pansin ang kawalan ng aksyon ni Mayor Navarro.

Maging ang tanggapan nina Region 2, PNP Regional Director P/Supt. Rodrigo De Gracia, P/SSupt. Alexander Rafael, R2, PNP Provincial Director P/SSupt. Francis Mabanag at Santiago City Director P/SSupt. Sevirino Abad ay kinalampag na rin ng mga konsernadong residente ngunit wala ring aksyon ang mga ito kaya nais na nilang idulog ang problema sa tanggapan ni PNP Chief Director General Nicanor Bartolome.

Base sa paglalarawan ng isa sa mga nagrereklamong grupo, nakapangingilabot na ang mga kabataang babae sa lungsod ay nabubulid sa pagbibilad at pagbebenta ng kanilang murang katawan kapalit ng maliit ng halaga.  Isinasangkalan umano ang kahirapan ng buhay kaya nakukumbinsi ng mga may-ari ng nasabing mga bahay-aliwan ang mga kabataan na magtrabaho sa kanila. Ang pangamba naman ng mga lider ng ilang religious groups sa lungsod ay posibleng kumalat ang mga nakakahawang sakit sa lungsod dahil sa talamak na bentahan ng aliw sa mga bahay-aliwan.

Nagpapahayag ng kalungkutan ang mga ito dahil sa kabila na babae ang kanilang alkalde ay hinahayaan nitong maging “kalakal” ang kanyang mga kabaro sa mga bahay-aliwan na nakahilera mismo patungo sa kanyang tirahan.

Source: Remate, February 9, 2012 p.3